टाटा 'इंट्रा ' - नवे छोटे मालवाहू ट्रक

           टाटा 'इंट्रा ' नावाचे दोन छोटे मालवाहू ट्रक 'टाटा मोटर्स 'ने नुकतेच मोटरपेठेत आणले. इंट्रा  व्ही १० आणि व्ही २० आशिया दोघांची नावं असून त्यांना अनुक्रमे ८०० आणि १४०० सीसी इंजिनांकडून शक्तिपुरवठा केला जाईल.   'बी एस ६' निकषांची पूर्तता करणारे हे छोटे ट्रक तयार करून 'टाटा मोटर्स 'ने भारतीय मोटार उत्पादन क्षेत्रात पुढचं पॉल टाकलं आहे. साडेपाच लाख रुपयांपासून पुढे किंमत असलेल्या या मालट्रकांमुळे छोटा हत्ती आणि एस या मालवाहू गाड्यांना नवे रूप प्राप्त झालं आहे.

         

           नवा आकर्षक चेहरा असलेली चालकाची कॅबिन, कारसारखा पॉश अंतर्भाग, आरामदायी बैठक आणि इलेक्ट्रॉनिक इन्स्ट्रुमेंट पॅनल ही या गाड्यांची प्रथमदर्शनीच नजरेत भरणारी वैशिष्ट्यं आहेत. मोठ्या आकाराची चालकांसमोरची काच, मोठे हेडलाईट आणि पूर्वीपेक्षा जास्त मोकळीक देणारी कॅबिनमधली जागा यामुळे चालकाला या गाड्या हाताळणं सोपं जाणार आहे. चालकाच्या आसनाला दिलेल्या हेडरेस्टबरोबरच डॅशबोर्डावर बसवलेल्या गिअरलीव्हरमुळे वारंवार गिअर बदलण्याचं काम सुलभ होईल. या गाडयांना पॉवर स्टिअरिंग  हे स्टॅंडर्ड उपकरण असल्याने चालकांचे श्रम कमी होणार आहेत.

          'टाटा ' ट्रकच्या चेहरेपट्टीची ओळख टिकवून ठेवणारं कॅबिनचं डिझाईन एनव्हीएच अर्थात आवाज, थरथर आणि उष्णतेची पातळी मर्यादित राखील असं उत्पादकांचं म्हणणं आहे.  म्युझिक सिस्टीम, मोबाईल चार्जिंग,  कुलुपयुक्त ग्लोव्ह बॉक्स, एचव्हीएसी, गिअर बदलण्याची सूचना देणारा गिअर शिफ्ट अडवायझर या सुविधा आहेत.

           यापैकी इंट्रा व्ही १० करिता  ७९८ सीसीचं दोन सिलिंडरचं प्रति मिनिट ३७५० फेऱ्यांत ३० किलोवॅट (४० एचपी ) शक्ती निर्माण करणारं इंजिन वापरलं आहे. ते प्रति मिनिट १७५० ते २५०० फेऱ्यांत ९६ न्यूटन मीटर टॉर्क निर्माण करतं.

          इंट्रा व्ही २० करिता १३९६ सीसीचं चार सिलिंडरचं प्रति मिनिट ४००० फेऱ्यांत ५२ किलोवॅट (७० एचपी ) शक्ती निर्माण करणारं इंजिन वापरलं आहे. ते प्रति मिनिट १८०० ते ३००० फेऱ्यांत १४० न्यूटन मीटर टॉर्क निर्माण करतं.  पाच गतीचा गिअरबॉक्स बसवला आहे.

          दोन्ही गाड्यांच्या इंजिनांत फरक असला तरी त्यांचं  सस्पेन्शन, टायर आणि हौद्याची मापं सारखीच आहेत. दोन्ही गाडयांना सस्पेन्शनसाठी स्प्रिंग पाटे वापरले असून त्यांची संख्या पुढे ६-६ आणि मागे ७-७ पाटे आहेत. १६५ आर १४ एलटी (१४ इंच ) रॅडियल टायर  वापरले आहेत. २५१२ मिमी X १६०३ मिमी (८.२ X ५.३ फूट) मापाचा हौदा आहे.

          दोन्ही गाडयांना दोन वर्षं किंवा ७२ हजार किलोमीटरची वॉरंटी आहे.

'फोर्स मोटर्स 'ची मध्यम क्षमतेची चार वाहनं

          मालवाहतुकीच्या क्षेत्रात 'फोर्स मोटर्स 'ने मध्यम क्षमतेची  चार वाहनं ग्राहकांना देऊ केली आहेत. त्यांपैकी दोन आहेत 'ट्रॅक्स क्रूझर 'च्या चेहऱ्याच्या आणि दोघांची चेहरेपट्टी रुबाबदार ट्रकची आहे. यांपैकी तीन वाहनांसाठी १९४७ सीसी क्षमतेची तीन सिलिंडर इंजिनं वापरली आहेत. छोट्या वाहनांमध्ये 'ट्रॅक्स कार्गो किंग स्टार ' आणि 'ट्रॅक्स कार्गो किंग ग्रँड ' तसंच 'शक्तिमान २००' यांचा या मालिकेत समावेश आहे. 'शक्तिमान ४००' नावाचं चौथं वाहन आकाराने फार मोठं नसूनही साडेतीन टन माल वाहून नेण्याची त्याची क्षमता आहे.

          पहिल्या तीनही गाड्यांसाठी 'बीएस ४' निकष पूर्ण करणारं 'एफएम २.० सीआर ' नावाचं १९४७ सीसी क्षमतेचं कॉमन रेल डिझेल इंजिन वापरलं आहे. ते प्रति ३२०० फेऱ्यांत ६७ एचपी (५० किलोवॅट ) शक्ती निर्माण करतं; तसंच प्रति मिनिट १६०० ते २४०० फेऱ्यांत १७५ न्यूटन मीटर टॉर्क निर्माण करतं. हे तीन सिलिंडरचं इंजिन असल्यामुळे आटोपशीर जागेत बसतं. हे टर्बो इंटरकूलर इंजिन आहे. त्याचा आवाज काहीसा मोठा वाटला तरी तीन सिलिंडर असूनही थरथर खूपच कमी आहे.

         'शक्तिमान ४००'साठी  'बीएस ४' निकष पूर्ण करणारं 'एफएम २.६ सीआर ' नावाचं २५९६ सीसी क्षमतेचं कॉमन रेल डिझेल इंजिन वापरलं आहे. ते प्रति २८००फेऱ्यांत ९० एचपी (६७ किलोवॅट ) शक्ती निर्माण करतं; तसंच प्रति मिनिट १४०० ते २४०० फेऱ्यांत २५० न्यूटन मीटर टॉर्क निर्माण करतं. हे चार  सिलिंडरचं टर्बो इंटरकूलर इंजिन आहे.

         या चारही वाहनासाठी ओव्हरड्राइव्हसह पाच पुढचे अधिक रिवर्स असलेले सिंक्रोनायझिंग गिअरबॉक्स वापरले आहेत. सर्वांच्या मागच्या चाकांना गती पुरवठा होतो.

     

   'ट्रॅक्स कार्गो किंग स्टार ' - हा १२५० किलो (सव्वा टन ) पेलोड क्षमतेचा ट्रक आठ फूट लांबीच्या हौद्यासह किंवा नुसती कॅबिन व चासी स्वरूपात मिळतो.  लांबी साडेसोळा  फूट (५०३२ मिमी ) आणि व्हील बेस पावणेनऊ फूट (३००० मिमी ) आहे. 

         या गाडीची चालकाची कॅबिन दोन आसन क्षमतेची बकेट सीटची आहे. आत बसताच अत्यंत आरामशीर वाटतं. मोजकेच मीटर आणि ठळक दिसणारे मोजकेच इंडिकेटर असणारं सुटसुटीत इन्स्ट्रुमेंट पॅनल हे कोणत्याही ट्रक चालकाला आवडेल.

         'ट्रॅक्स कार्गो किंग ग्रँड ' - हा १५०० किलो (दीड टन ) पेलोड क्षमतेचा ट्रक आठ फूट लांबीच्या हौद्यासह किंवा नुसती कॅबिन व चासी स्वरूपात मिळतो. यामध्ये दुहेरी कॅबिन मॉडेलही आहे. लांबी साडेसतरा फूट (५३६० मिमी ) आणि व्हील बेस साडेदहा फूट (३२५० मिमी ) आहे.

         शक्तिमान -आखूड बॉनेटचे दोन 'शक्तिमान ' ट्रक ही या मालकेतील चांगली ऑफर आहे. उंच बांधणी आणि निमुळत्या आखूड बॉनेटमुळे चालकाला रस्त्यावरचं  दृश्य व्यवस्थित दिसू शकेल. या ट्रकांना पुढे बॉनेट असलं तरी त्यांची इंजिनं मात्र छोटा हत्ती किंवा आयशरसारखी चालकाच्या बैठकीखाली बसवली आहेत. त्यामुळे कॅबिनमधल्या जागेत अडचण वाटत नाही आणि चालकाच्या पायाला इंजिनच्या उष्णतेचा त्रास होण्याचंही टळतं. या 'मिड इंजिन' पद्धतीमुळे गाडी रिकामी पळताना अधिक स्थिरता मिळते. याशिवाय बॉनेट असूनही जास्त लांबीचा हौदा बसवता येतो. या वाहनांचे रेडिएटर मात्र बॉनेटमध्ये बसवले आहेत, ते इंजिनापासून दूर असल्याने तापमान मर्यादित राखणारी कूलिंग सिस्टीम अधिक कार्यक्षम होते.  रेडिएटर कूलंट, काच स्वच्छ करण्याचं पाणी आणि ब्रेक व पॉवर स्टिअरिंगचं तेल भरण्यासाठी बॉनेटमधून व्यवस्था आहे आणि तिथे इंजिनची गुंतागुंत नसल्याने चालकाचा  गोंधळ होण्याचं कारण नाही.  

       
        या दोन्ही मालट्रकांना प्रत्येकी चारच चाकं दिली आहेत. मात्र त्यांची मापं वेगवेगळी आहेत. दोहोंना पुढे मागे लीफ स्प्रिंग (पाटे ) आणि शॉकबसॉर्बर तसंच पुढे अँटिरोलबार दिले आहेत.  दोहोंकरिता साधं (मेकॅनिकल ) अथवा पॉवर स्टिअरिंग निवडता येतं.

        मध्यम आणि दूरच्या अंतरासाठी वापरण्यास हे दोन्ही ट्रक सोयीस्कर ठरतील. विशेषतः जनरेटर, इंजिनं, लेथ मशीन, छपाई मशीन, वृत्तपत्रीय कागदाच्या मोठ्या गुंडाळ्या यांसारख्या वजनदार पण कमी लांबी रुंदीच्या वस्तूंच्या वाहतुकीसाठी ते योग्य वाटतात. अगदी कमी लांबी रुंदीमुळे शहरी गर्दीच्या रहदारीत हाताळायला सोपे आहेत.
              

   'शक्तिमान २०० ' - हा १७५० किलो (पावणेदोन टन ) पेलोड क्षमतेचा ट्रक नऊ फूट लांबीच्या हौद्यासह किंवा नुसती कॅबिन व चासी स्वरूपात तसेच कॅबिन व पूर्ण उंचीच्या हौद्यासह मिळतो. यामध्ये दुहेरी कॅबिन मॉडेलही आहे. लांबी साडेपंधरा फूट (४७२५ मिमी ) आणि व्हील बेस नऊ फूट (२७७० मिमी ) आहे.

     
        या ट्रकला २१५/७५ आर १५ मापाचे रॅडियल टायर वापरले आहेत. पुढे डिस्क ब्रेक आणि मागे ड्रम ब्रेक आहेत. मागचे ब्रेक 'एलसीआरव्ही' या प्रकारचे आहेत. त्याचे शू जसजसे झिजतील तसतसे आपोआप जुळण्याची व्यवस्था आहे.

       'शक्तिमान ४००' - हा ३५०० किलो (साडेतीन टन ) पेलोड क्षमतेचा ट्रक नऊ फूट लांबीच्या हौद्यासह किंवा नुसती कॅबिन व चासी स्वरूपात तसेच कॅबिन व पूर्ण उंचीच्या हौद्यासह मिळतो. यामध्ये पूर्ण उंचीच्या हौद्याच्या मॉडेलची क्षमता ३५०० किलो तर साध्या हौद्याच्या मॉडेलची क्षमता ३६२० किलो आहे. लांबी सव्वासतरा  फूट (५१७० मिमी ) आणि व्हील बेस सव्वादहा फूट (३१०० मिमी ) आहे.

     या ट्रकला ८.२५ X १६ मापाचे १६ प्लाय टायर वापरले आहेत. पुढे आणि मागे ड्रम ब्रेक आहेत. मागचे ब्रेक 'एलसीआरव्ही' या प्रकारचे आहेत. त्याचे शू जसजसे झिजतील तसतसे आपोआप जुळण्याची व्यवस्था आहे.

करिष्मा मोटारसायकल : रॉयल एन्फिल्ड 

मोटारसायकल चालवणाऱ्या कोणत्याही भारतीयाच्या मनात 'बुलेट'विषयी एक वेगळाच दबदबा असतो. मूळ ब्रिटिश बनावटीच्या 'रॉयल एन्फिल्ड' या मोटारसायकलचा भारतात 'बुलेट ' या नावाने अनेक वर्षं वापर झाला. पण गेली काही वर्षं 'बुलेट'सह रॉयल एन्फिल्डची आणखीही मॉडेलं भारतीय मोटरपेठेत उपलब्ध आहेत.
रॉयल एन्फिल्ड मोटारसायकली ३५०, ५०० आणि ६५० सीसी क्षमतेच्या पेट्रोल इंजिनांसह उपलब्ध आहेत. यांपैकी ६५० सीसीचं इंजिन ट्विन सिलिंडरचं आहे.

१९३२ पासून मोटारसायकलस्वारांच्या मनात अढळ स्थान असलेली 'बुलेट', क्लासिक आणि थंडरबर्ड या तीन गाड्या ३४६ किंवा ४९९ सीसी इंजनसह मिळतात. प्रति मिनिट ७२५० फेऱ्यांत ४७ हॉर्सपावर शक्ती निर्माण करणारं ६४८ सीसी एअर /वॉटर कूल्ड इंजिन इंटरसेप्टर आणि जीटी कॉन्टिनेन्टल कॅफे रेसर गाड्यांसाठी वापरली आहेत. 'बुलेट', क्लासिक आणि थंडरबर्ड या एकेका सायलेन्सरच्या तर इंटरसेप्टर आणि जीटी कॉन्टिनेन्टल या दोन दोन सायलेन्सरच्या गाड्या आहेत. (काँटिनेंटलच्या टेस्ट राईड रिपोर्टसाठी पहा-मोटार जगत मार्च २०१५) याशिवाय हिमालया ही 'क्रॉस कंट्री' प्रकारातली ५०० सीसी मोटारसायकलही रॉयल एन्फिल्डने गेल्या वर्षी मोटारपेठेत उतरवली आहे.

मोठी इंजिनं असलेल्या या मोटारसायकली वेगवेगळ्या उद्देशाने वापरण्यासाठी निवडणं योग्य. नेहमीच्या वापरासाठी तसंच दूरच्या प्रवासासाठी अखंड बैठक असलेल्या बुलेट, थंडरबर्ड  अधिक चांगल्या. हौशी रुबाबदार स्वाराला एकेरी बैठकीची क्लासिक शोभून दिसेल. लष्करी रंगछटांची, काऊबॉय सजावट करता येण्यासारखी दुसरी कुठलीच मोटारसायकल भारतात रॉयल एन्फिल्ड क्लासिकच्या क्षमता आणि किंमत गटात उपलब्ध नाही.

भारतीय बनावटीच्या मोटारसायकलींमध्ये 'कॅफे रेसर' या प्रकारचं मॉडेल सध्या तरी फक्त रॉयल एन्फिल्ड जीटी कॉन्टिनेन्टल हेच आहे. या गाडीला स्लीपर क्लचसह सहा गतीचा गिअरबॉक्स आहे.  दूरच्या प्रवासात बाहू आणि छातीला अधिक सुखकर वाटण्यासाठी थंडरबर्डची निवड सार्थ ठरेल. सुपरबाइक वापरण्याची हौस असेल तर इंटरसेप्टर ही बजटमधली मोटारसायकल आहे. रॉयल एन्फिल्डच्या सर्व मॉडेलमध्ये रंगछटांच्या निवडीला पुष्कळच वाव आहे. प्रत्येक मॉडेलची रंगाची धाटणी (स्टाईल) निरनिराळी आहे आणि मॉडेलनुसार रंगही वेगवेगळे आहेत.

गॅरेजचा सुवर्णमहोत्सव, संस्थापकांचा अमृतमहोत्सव

                   

बंधू बाष्टे यांना शुभेच्छा देताना डावीकडून सर्वश्री सुभाष थरवळ,
मंदार सावंतदेसाई, विलास पाटणे व राजशेखर मलुष्टे. (छाया : मकरंद पटवर्धन )

         रत्नागिरी येथील ज्येष्ठ मेकॅनिक आणि 'मोटार जगत'चे सन्माननीय सल्लागार  (पहा- आम्ही) सुभाष श्रीराम तथा  बंधू बाष्टे यांनी नुकताच आपल्या आयष्याचे अमृतमहोत्सवी वर्ष पूर्ण केले. योगायोग असा की याच महिन्यात 'सुभाष ऑटो रिपेअर्स' या त्यांच्या मोटार गॅरेजच्या स्थापनेला पन्नास वर्षे पूर्ण झाली. त्यांच्या अनेक हितचिंतकांनी सुभाष ऑटो रिपेअर्स येथे त्यांची भेट घेऊन त्यांना शुभेच्छा दिल्या.

         संयुक्त महाराष्ट्राच्या स्थापनेनंतर राज्यात सुरु झालेल्या जिल्हावार औद्योगिक प्रशिक्षण संस्थांमध्ये रत्नागिरी येथील 'आयटीआय'चाही समावेश होता. तेथे सुरु झालेल्या मोटार वाहन दुरुस्ती अभ्यासक्रमाच्या पहिल्या तुकडीतून बंधू उत्तीर्ण झाले. त्यानंतर त्यांनी मुंबईतील प्रख्यात मेकॅनिक आनंद स्वादी यांच्या वर्कशॉपमध्ये उमेदवारी केली आणि १९६९ च्या गुढीपाडव्याचा मुहूर्त साधून रत्नागिरी येथे स्वतः;चे गॅरेज सुरु केले. मोटारीच्या रचनेचे व दुरुस्तीचे सखोल  ज्ञान, नव्या तंत्रज्ञानाचा अभ्यास, व्यावसायिक सचोटी आणि स्वागतशील स्वभावामुळे  त्यांनी अल्पावधीत नावलौकिक मिळविला. मोटारीव्यतिरिक्त इतर अनेक विषयांत असलेली गोडी, शहराच्या स्थानीय इतिहासाचे ज्ञान आणि सामाजिक वाटचालीचे सूक्ष्म निरीक्षण यामुळे बंधू विविध क्षेत्रांतील जाणकारांमध्येही लोकप्रिय झाले. त्यांची व्यावसायिक व सामाजिक योग्यता लक्षात घेऊन साप्ताहिक आरसा' आणि 'मोटार जगत'तर्फे त्यांना २००११ मध्ये 'मोटार जगत जीवन गौरव' प्रदान करण्यात आला होता. 

             बंधूंच्या वाढदिवसानिमित्त गॅरेजमध्ये झालेल्या अनौपचारिक आणि उत्स्फूर्त छोटेखानी मित्रमेळाव्याला वकील सर्वश्री राजशेखर मलुष्टे, विलास पाटणे, अशोक भिसे, 'मोटार जगत'चे संपादक राजेंद्रप्रसाद मसुरकर, ज्येष्ठ नागरिक संघाचे अध्यक्ष सुभाष थरवळ, मुंबई विद्यापीठ सिनेट सदस्य मंदार सावंतदेसाई इत्यादी मान्यवरांची उपस्थिती होती. बंधूचे सुपुत्र गौतम यांनी उपस्थितांचे स्वागत केले. गॅरेजचा सुवर्णमहोत्सव आणि संस्थापकांचा अमृतमहोत्सव असा दुग्धशर्करा  योग्य जुळून येणे ही बंधूंसाठीच नव्हे तर रत्नागिरीकरांसाठीही संस्मरणीय गोष्ट आहे असे श्री. मलुष्टे म्हणाले, तर बंधू हे 

मोटार क्षेत्रातील ज्येष्ठ सुसंस्कृत व्यक्तिमत्व असल्याचे 

श्री. पाटणे यांनी सांगितले. केवळ मोटारगाडीचेच नाही तर

इतिहास आणि अन्य अनेक विषयांचे बंधू बाष्टे

जाणकार आहेत अशा शब्दांत श्री. मसुरकर यांनी

त्यांचा गौरव केला.

बंधूंना शुभेच्छा देताना राजेंद्रप्रसाद मसुरकर, 
उजवीकडील चित्रात
प्रसन्न व्यक्तिमत्त्वाचे सुभाष श्रीराम तथा बंधू बाष्टे.
(छाया : मकरंद पटवर्धन )

'कारखान्यात तयार केलेले रस्ते' प्रचारात आणणार - नितीन गडकरी

केंद्रीय रस्ते वाहतूक मंत्री नितीन गडकरी यांनी भारतभर उत्कृष्ट रस्त्यांचे जाळे विणण्यासाठी अनेक प्रकल्प सुरु केले आहेत.'कारखान्यात तयार केलेले कृत्रिम रस्ते' प्रचारात आणण्याची कल्पना त्यांनी नुकतीच एका समारंभात मांडली.
 रस्त्यावरील वाहतूक गतिमान आणि सुरक्षित होण्यासाठी नवनवीन तंत्रांचा अवलंब करण्याबाबतही ते सतत अभ्यास करत असतात. याच उत्साही आणि नावीन्य शोधक वृत्तीतून प्रचलित पद्धतीने डांबरी अथवा सिमेंटचे रस्ते तयार करण्याऐवजी कारखान्यात रस्त्यांचे सुटे भाग बनवायचे आणि ते जागेवर आणून जोडायचे यावर संशोधन होण्याची गरज श्री. गडकरी यांनी बोलून दाखवली. अशा प्रकारे रस्ते तयार केल्यास रस्ते उभारणीच्या खर्चात ३० ते  ४० टक्के बचत होईल, रस्ते बांधणीच्या कामामुळे वाहतुकीचा खोळंबा होण्याचे टाळता येईल आणि  एका रात्रीत रस्त्याची उभारणी शक्य होईल. प्लास्टिक कचऱ्याचा या प्रक्रियेत वापर केल्यामुळे पर्यावरणाच्या समस्येवरही प्रभावी उपाययोजना करता येईल असे मत त्यांनी प्रकट केले.                     आणखी वाचा - पान नवीन 

भारतीय ट्रक उद्योगात क्रांतीचे पाऊल - ट्रकवर एएमटी गिअरबॉक्स

स्वयंचलित गिअरबॉक्स बसविलेल्या मोटारी आता आपल्याकडे चांगल्या रुळल्या  आहेत, मात्र आजवर हा विषय कर आणि एसयूव्हीपुरताच मर्यादित होत.आता 'आयशर' या नामवंत ट्रक उत्पादकांनी अर्ध स्वयंचलित (ऑटोमेटिक मॅन्युअल ट्रान्समिशन - एएमटी ) ट्रक भारतीय मोटरपेठेत आणला आहे.  भारतात तयार होणारा हा या प्रकारचा पहिला ट्रक आहे. 'आयशर प्रो ३०१६' असे याचे नाव असून त्याची क्षमता १६ टन आहे.

मध्यम व्यावसायिक वाहन प्रकारात 'महिंद्रा'ची नवी ट्रक मालिका 

तीसपेक्षा जास्त व्यावसायिकांनी १३ लाख किलोमीटर वापर करून समाधान व्यक्त केल्यानंतर 'महिंद्रा ट्रक अँड बस' ने नवी 'फ्युएरो' ट्रक मालिका मोटरपेठेत उतरवली आहे. 'महिंद्रा अँड महिंद्रा'चे व्यवस्थापकीय संचालक डॉ' पवन गोएंका यांनी आपल्या ज्येष्ठ सहकाऱ्यांसह त्याचे शानदार मीडिया सादरीकरण केले.    आणखी वाचा ....नवीन     

प्रतीक्षा संपली !!!

                                                  'नवी  वॅगन आर ' विक्रीसाठी खुली !

              

गेल्या वर्षाच्या अखेरीपासून प्रतीक्षा असलेली 'नवी  वॅगन आर ' आज देशभरात विक्रीसाठी खुली झाली. दोन इंजिने आणि सध्या तसेच स्वयंचलित गिअरबॉक्सच्या निवडीचा पर्याय घेऊन ती शोरूममध्ये दाखल झाली आहे. नवी  दिल्लीत ४ लाख १९ हजार ते ५ लाख ६९ हजार रुपये शोरूम किंमतीत तिचे दोन विविध प्रकार ग्राहकांना उपलब्ध आहेत. मुंबईत ती ४.२८ ते    या किमतीत मिळेल.  आणखी वाचां नवीन 

 ----आणि 'टाटा हॅरिअर 'सुद्धा !

 २०१८ च्या 'ऑटो एक्स्पो 'मध्ये  प्रथम प्रदर्शित झालेली 'टाटा हॅरिअर' सुद्धा याच दिवशी विक्रीसाठी खुली झाली.  'एसयूव्ही' वर्गातील टाटा हॅरिअर विकसित करताना उत्पादकांनी सुरक्षिततेला प्राधान्य दिले आहे. प्रगत 'इलेक्ट्रॉनिक स्टॅबिलिटी प्रोग्रॅम (ईएसपी )' , चालकासह सहा एअर बॅगा आणि मुलांसाठी 'आयसोफिक्स ' तंत्राद्वारे सुरक्षित बनवलेलं खास बैठक या सुविधांसह ती ग्राहकांना उपलब्ध होईल.  आणखी वाचां नवीन 

'जेएसडब्ल्यू पोर्ट 'तर्फे ट्रकचालकांना रस्ता सुरक्षाविषयक प्रशिक्षण

              दररोज सुमारे चारशे ट्रकांची ये-जा असणाऱ्या 'जेएसडब्ल्यू पोर्ट लिमिटेड 'तर्फे ट्रकचालकांच्या रस्ता सुरक्षाविषयक प्रशिक्षणाचा कार्यक्रम नुकताच पार पडला. 'समजूतदार ट्रकचालक' हा स्लाईड शो दाखवून 'मोटार जगत'चे संपादक राजेंद्रप्रसाद मसुरकर यांनी उपस्थित ट्रकचालकांना सुरक्षित ड्रायव्हिंगविषयी प्रबोधनपर व्याख्यान दिले. जवळजवळ शंभर ट्रकचालकांनी या कार्यक्रमाचा लाभ घेतला.

उदघाटनाच्या वेळी संबोधित करताना श्री. रवी,
सर्वश्री समीर गायकवाड, सुरेश चव्हाण, जोगळेकर. 

             दरवर्षी जानेवारी महिन्यात पाळल्या जाणाऱ्या राष्ट्रीय रस्ता वाहतूक सुरक्षा सप्ताहानिमित्त हा उपक्रम घेण्यात आला. कंपनीचे  उपाध्यक्ष आणि युनिट हेड कॅप्टन रवी चंदर श्रीराम यांनी कार्यक्रमाचे उदघाटन केले. रस्ते वाहतुकीतील अपघातांच्या प्रमाणाचे गांभीर्य सांगून ' एका व्यक्तीचे प्राण वाचले  तरी हे प्रमाण कमी होईल.' असे म्हणत  प्रत्येक चालकाने त्यासाठी मनापासून प्रयत्न करावे असे आवाहन त्यांनी केले.
            'मोटार जगत' आणि 'मसुरकर्स अकॅडमी ' यांच्या संयुक्त विद्यमाने  'समजूतदार ट्रकचालक' या  स्लाईड शोच्या माध्यमातून सादर केलेल्या ट्रकचालकांच्या प्रबोधन आणि प्रशिक्षणाच्या कार्यक्रमात श्री मसुरकर यांनी चालकांशी संवाद साधत चालकाचे देशातील वाहतूक व्यवसायातील स्थान स्पष्ट केले. या व्यवसायाचे  अर्थकारण, अपघातांमध्ये असणारे मालट्रकांचे प्रमाण आणि महामार्ग तसेच अन्य रस्त्यांवरील अपघातांचे प्रमाण याची माहिती त्यांनी दिली. अपघातांची कारणे, ते टाळण्याचे उपाय आणि नवे तंत्रज्ञान याबद्दलही ते बोलले.
            'मोटार जगत'च्या 'समजूतदार ट्रकचालक' या विशेषांकाच्या प्रती यावेळी चालकांमध्ये वितरित करण्यात आल्या. रत्नागिरी महामार्ग पोलिसांच्या आवाहनावरून प्रकाशित करण्यात आलेल्या या विशेषांकाच्या निर्मितीसाठी सहकार्य केलेल्या आस्थापनांमध्ये 'जेएसडब्ल्यू एनर्जी लिमिटेड, जयगड ' या उद्योगाचा समावेश आहे. (अंकासाठी भेट द्या : पान छापील अंक ')   
            'जेएसडब्ल्यू पोर्ट लिमिटेड 'च्या जनसंपर्क तसेच अन्य विभागांचे अधिकारी समीर गायकवाड, श्री. जोगळेकर इत्यादी त्यांच्या सहकाऱ्यांसह उपस्थित होते. मोटार जगत परिवाराचे ज्येष्ठ सहकारी सुरेश चव्हाण यांनी ट्रक चालकांच्या सुरक्षाविषयक प्रबोधनासाठी हा कार्यक्रम आयोजित केल्याबद्दल 'जेएसडब्ल्यू पोर्ट लिमिटेड ' आणि अधिकाऱ्यांचे आभार मानले.